一次性設定 · 大約 2 分鐘

加到 iPhone 分享選單

設定一次，之後喺 Instagram 或 OpenRice 見到餐廳，撳分享 → 搵食，就自動入庫。

✓

先睇下完成之後會係點

呢個就係你要做到嘅嘢 —— 分享選單入面多咗「搵食」。

應用程式

AirDrop
🍜NEW
搵食
訊息
備忘錄
複製連結
儲存至相片

撳「搵食」→ 個 app 會自動開，餐廳已經加好。

1

打開「捷徑」app，撳右上角 ＋

「捷徑」係 iPhone 內置嘅 app，唔使下載。

9:41▮▮▮ ⌁
所有捷徑 ＋

灰色格仔係你原本已經有嘅捷徑（唔使理）

撳右上角 ＋ 開一個新捷徑。

2

設定分享表 —— 呢步最關鍵

撳頂部嘅 ⓘ 詳細資料，然後開下面兩個掣。

9:41▮▮▮ ⌁
取消 詳細資料 完成
名稱 新捷徑
在分享表中顯示

分享表類型

URL 文字 圖片 檔案

只留 URL 同 文字，其他全部熄咗佢 —— 咁分享選單就唔會成日彈出嚟。

點解要「在分享表中顯示」？呢個掣就係「令佢出現喺分享選單」嘅開關。 唔開嘅話，做完之後 Instagram 分享選單入面係搵唔到「搵食」嘅。
3

加入「打開 URL」動作

撳 加入動作，搜尋 URL， 揀 打開 URL（英文係 Open URLs）。

9:41▮▮▮ ⌁
‹ 所有捷徑 新捷徑 ⓘ
打開 URL
URL

成個捷徑只會有呢一個動作 —— 冇其他嘢要加。

4

喺 URL 欄貼上呢段，再插入「捷徑輸入」

先撳一下 URL 欄，貼上下面嗰段；然後喺鍵盤上面嗰行撳 捷徑輸入 插去尾。次序係：先貼、後插。

https://wansik.pages.dev/#add=
9:41▮▮▮ ⌁
‹ 所有捷徑 新捷徑 ⓘ
打開 URL
https://wansik.pages.dev/#add=捷徑輸入
鍵盤上面嗰行
捷徑輸入 剪貼板 目前日期

「捷徑輸入」＝ 佢分享嗰條 link。所以最後個 URL 就係
你貼嘅前綴 ＋ IG 或 OpenRice 條 link。

5

改名做「搵食」，撳完成

個名就係分享選單入面顯示嘅名。

9:41▮▮▮ ⌁
取消 詳細資料 完成
名稱 搵食
圖像 🍜 橙色
在分享表中顯示

打完名記得撳右上角完成，唔係就唔會儲存。

⚠️ 兩個一定要留意嘅位

① 一定要用 Safari 開「搵食」，唔好「加落主畫面」。
iOS 會將「主畫面 App」同 Safari 嘅資料完全分開，係兩個獨立倉庫。 分享捷徑一定會開 Safari —— 所以如果你加咗落主畫面， 分享入嚟嘅餐廳會落喺 Safari 嗰邊，而你開主畫面 App 永遠都見唔到，會以為冇加到。

做法：用 Safari 開 wansik.pages.dev，然後加書籤（唔係加主畫面）。
② 貼嘅時候唔好加 URL 編碼。
直接用鍵盤上面嗰個「捷徑輸入」，唔好用「URL 編碼」嗰類動作。 我哋用 # 而唔係 ? 就係為咗呢件事 —— # 後面嘅嘢唔會被當成參數拆散，所以唔使編碼， 亦唔會整爛 OpenRice 本身帶嘅 &。 加咗編碼反而會壞。

試一次

去 Instagram 搵一間餐廳嘅貼文 → 撳分享 → 揀「搵食」。

正常嘅話：會自動跳去 Safari 開「搵食」，個餐廳已經加好， 下面彈一句「已加入：XXX（地區）」。 如果認唔到個名，會開表單叫你打返個名 —— 打完之後地區同地址會自己填。

如果唔正常：睇下你見到邊一句

個 app 會直接話你知壞喺邊。唔使猜，亦都唔使再問人。

📎 分享入嚟，但係冇帶到連結
＝ 步驟 4 冇插到「捷徑輸入」。
個捷徑打開咗個網頁，但係冇帶住你分享嗰條 link 過去。 返去步驟 4，喺 #add= 後面撳一下，再揀鍵盤上面嗰個 捷徑輸入。
（臨時都可以撳 app 入面嘅「📋 貼上連結」照用。）
去咗個網頁，但係咩都冇彈、咩都冇加
先睇你係用邊個開 —— 兩個可能：
① 你開住嘅係「主畫面 App」，唔係 Safari。 iOS 兩邊資料唔通，所以 Safari 加咗嘅嘢你喺主畫面版本度見唔到。 睇上面警告① —— 用 Safari 開，加書籤，唔好加主畫面。
② 你係用 Safari，但係步驟 4 個 URL 連 #add= 都冇。 返去捷徑睇一睇：URL 欄一定要係 …/#add= 後面黐住嗰粒橙色 捷徑輸入。
開咗表單，但係店名空白
＝ 呢條 link 本身冇帶店名，唔係壞。
最常見係 OpenRice app 分享出嚟嘅短連結（/r-r883033 咁嘅樣）。 打個店名落去就得，地區同地址會自己填 —— 而且會跟你條 link 嗰間分店，唔會亂估。
分享選單見唔到「搵食」
＝ 步驟 2 冇做，或者你分享嘅係圖片。
見下面 FAQ。

搞唔掂？

分享咗，開到網頁，但係冇自動加／冇自動搵
呢個係最常見嘅一個。睇上面「試一次」嗰個對照表，個 app 會話你知係邊種：

① 見到「📎 分享入嚟，但係冇帶到連結」 → 步驟 4 漏咗插「捷徑輸入」，個捷徑冇帶條 link 過去。

② 完全冇提示，就咁一個乾淨嘅「搵食」畫面 → 兩個可能：你開住嘅係主畫面 App（唔係 Safari，兩邊資料唔通）； 或者捷徑個 URL 連 #add= 都冇。上面警告① ＋ 步驟 4。

③ 開咗表單但店名空白 → 正常，條 link 冇帶名，打個名就得。
分享選單入面見唔到「搵食」
九成係步驟 2 冇做。返去捷徑 app，撳個捷徑 → ⓘ 詳細資料 → 確認 在分享表中顯示 係開住（綠色）。

仲有：分享選單要向右捲先見到「應用程式」一行； 如果係分享圖片而唔係連結，「搵食」唔會出現 —— 呢個係故意嘅， 我哋只收 URL 同文字。
佢開咗「搵食」但係空白，冇加到嘢
大機會係你開咗主畫面 App 而唔係 Safari（見上面警告①）。 兩邊資料唔通，所以你喺主畫面版本度睇唔到 Safari 加嘅嘢。

檢查：用 Safari 開 wansik.pages.dev，睇下餐廳喺唔喺度。
個 URL 變成一串 %E6%B7%BB 咁嘅嘢
唔緊要，呢個係正常嘅 —— iOS 會自動幫中文做編碼，個 app 識解返。 （呢個之前係一個 bug，已經修好。）
地區填錯咗 / 連鎖店揀錯分店
開嗰張卡片 → 撳「編輯」→ 改地區。或者喺表單度， 下面會有其他分店嘅掣，一撳就換晒地區同地址。

如果你分享嘅係 OpenRice 連結，我哋會跟你條 link 嗰間分店， 唔會自己估。
OpenRice 話「暫時連唔到」
OpenRice 有時會擋我哋一陣。呢個時候個名照樣會填好， 你只需要自己揀返個地區就儲存得。通常過幾分鐘就冇事。
我想用 Android
唔使設定。Android 嘅 Chrome 支援分享目標 —— 將個網站「安裝」之後，「搵食」就會自動出現喺分享選單。

設定完之後，去 wansik.pages.dev 開始用。
記得用 Safari 開，加書籤就好。